1 outobru 2021: Ministra Saúde dr. Odete Maria Freitas Belo hamutuk ho Reprezentante OMS-TL Dr. Arvind Mathur ho Embaixadór Uniaun Europeira iha Timor-Leste Sr. Andrew Jacobs Inagura Uma ba Família pasiente

1 outobru 2021, Ministra Saúde dr. Odete Maria Freitas Belo hamutuk ho Reprezentante OMS-TL Dr. Arvind Mathur ho Embaixadór Uniaun Europeira iha Timor-Leste Sr. Andrew Jacobs Inagura Uma ba Família pasiente, iha Óspital Lahane, Díli. Iha inagurasaun Ministra Saúde hatete laiha serteza katak wainhira mak Covid-19 ne'e atu husik ita entaun ho kultura no tradisaun ne'ebé mak Timor-Leste iha, maneira ikus mak prepara uma ba família pasiente hodi nune'e pasiente labele senti mesak maske ho moras Covid-19.

"Ha'u hakarak atu hatene de'it katak Covid-19 ne'e hela ho ita kleur no ita laiha serteza katak wainhira mak Covid-19 ne'e atu husik ita entaun tratamentu ba Covid-19 nia espesifiku oituan, ita halo tratamentu ba pasiente aumezmu tempu ita mós prevene atu pasiente nia família labele moras maibé ita-nia Nasaun iha kultura ne'ebé mak diferente, ita-nia pasiente komfortavel liu wainhira ninia família ida besik nia, maske ida-ne'e ita senti katak tau risku ba sira, la'os risku ba sira de'it maibé risku ba ema hotu tanba OMS ninia lema hatete wainhira o la seguru, ha'u mós la seguru ou wainhira ita sira ne'e la seguru entaun ema seluk mak la segura."

"Entaun saidá mak ita halo, ita haree ba ita-nia kondisaun, ita-nia kultura ne'ebé mak iha, iha buat balun ne'ebé mak ita presiza atu hadi'a no tenki kompleta tanba ita la hatene vírus ne'e wainhira mak hotu. Kultura ida-ne'e ita-nia parseiru sira la taka matan, sira mós akompaña ita-nia tradisaun, ida-ne'e mak ita-nia kultura entaun sira koko atu prepara fó konstrusaun ruma ba ita-nia pasiente sira-nia família."

Ministériu Saúde agradese ba parseiru sira ne'ebé apoiu no ajuda Timor-Leste liu-liu iha situasaun Covid-19 hodi prevene Timoroan hotu husi Covid-19.

"Ba ha'u senti ajuda ida-ne'e hanesan liu ona saidá mak sira bele ajuda tanba buat ki'ik oan tebtebes mós sira fó apoiu, ida-ne'e ninia objetivu ida de'it atu bele hakotu transmisaun Covid-19 ne'e iha ita-nia rai liuhusi fatin sira ne'ebé mak ita halo tratamentu ba ita-nia pasiente sira no ha'u agradese ba parte rua OMS ho UE ninian kontribuisaun."

Enkuantu Alojamentu Temporária ne'e fundu mai husi Uniaun Europeira iha Timor-Leste no hetan kolaborasaun husi Organizasaun Mundiál Saúde iha Timor-Leste.

#MédiaPaláciodasCinzas