Intervensaun MS dr. Odete Maria Freitas Belo iha Lansamentu Distribuisaun Super Cereal

11 Maiu 2022: Ministra Saúde (MS) dr. Odete Maria Freitas Belo partisípa iha Lansamentu Distribuisaun Super Cereal ba Inan isin-rua no inan fó susu. Super Cereal entrega husi WFP Sr. Dageng Liu no akompaña direta husi Embaixadór Xína ba Timor-Leste Dr. Ciao Jianguo, iha Sentru Saúde Metinaru, Munisípiu Díli.

Iha Lansamentu ne'e, Ministra Saúde hatete nutrisaun importante tebes ba dezenvolvimentu saúde inan ho oan tanba feto foin sa'e no feto adultu ne'ebé nutrisaun di'ak sei iha bebe ne'ebé moris ho saudável.

"Labarik ne'ebé hetan propriu nutrisaun sei dezenvolve forsa iha sira-nia isin no hanoin, adolesente sira sei aprende di'ak liu no hetan atinjimentu aas iha eskola, adultu sira bele hetan serbísu ne'ebé di'ak, família no komunidade bele sai ou sees husi mukit la sees husi ki’ak nune'e Komunidade no Nasaun sei produtivu no estavel liután."

Situasaun nutrisaun iha Timor-Leste hatudu liuhusi peskiza ai-han no nutrisaun Timor-Leste tinan 2020 katak prevalénsia ka númeru má-nutrisaun sai natatin hanesan problema saúde públika iha labarik menus husi tinan lima (5) mai kraik.

Hirak ne'ebé ra’es badak hatudu 47%, todan menus 32% i krekas 8.6% nune'e mós ba estadu nutrisaun inan sira sei nafatin prekupasaun boot iha Nasaun ida-ne'e. Governu Timor-Leste liuhusi Ministériu Saúde iha komitmentu boot atu halo redusaun ba problema má-nutrisaun iha Timor-Leste liuhusi maneira oin-oin."

"Atu kombate problema má-nutrisaun iha Timor-Leste, ita hotu presiza serbísu hamutuk ho parseria oioin, mak hanesan agora daudaun serbísu hamutuk Ajénsia WHO, UNICEF, WFP, FAO no seluk-seluk tán, hodi bele suporta Governu, liuhusi liña koordenasaun iha KONSSANTIL, pontu vokál ba Movimentu Hadi'ak Nutrisaun nomós diretamente ba iha Ministériu Saúde.

Ohin loron ita serbísu hamutuk liuhusi kooperasaun ho Ajénsia ONU, suporta WFP ba Ministériu Saúde, hodi implementa programa tratamentu má-nutrisaun moderadu ba inan isin rua no inan fó susu ne'ebé uza komodity ai-han ho naran Super Cereal, ida-ne'e sei fó ba inan isin rua no inan fó susu, ai-han hirak-ne'e agora dadaun laiha stock no Ministériu Saúde hamutuk ho WFP mobiliza fundus, hodi bele kontinua atividade refere iha futuru oin mai."

"Iha tinan kotuk Ministériu Saúde serbísu hamutuk ho WFP halo distribuisaun ba ai-han komplementáriu ho naran biskoitu enerjia ba iha fatin evakuasaun iha Díli laran impaktu husi dezastre naturais no hetan mós suporta fundus husi Governu Nova-Zelandia.

Ohin biban ne'ebé di’ak tebes, Ministériu Saúde marka tan pasu importante ida ba halo serimónia lansamentu distribuisaun super cereal ba iha ita-nia inan isin-rua no inan fó susu ne'ebé hanesan esforsu husi Ministériu Saúde no WFP hetan suporta orsamentu husi Governu Xína ho total 535.28 tolenadas."

"Apoiu hirak-ne'e sei utiliza nu'udar responde ba problema má-nutrisaun ne'ebé sei aás iha Timor-Leste, tanba ne'e Super Cereal refere sei distribui ba Sentru Saúde hotu iha Munisípiu 13 inklui Rejiaun Administrativu Espesiál Oecusse Ambeno (RAEOA)."

Ita hetan entrega ai-han ida husi Perseiru ONU WFP ba iha Governu Timor-Leste no halo distribuisaun ba iha ita-nia benifisiariu sira-ne'ebé hanesan inan isin-rua no inan fó susu, liuhusi sukat liman kabun leten tuir matadalan jestaun integradu tratamentu ba má-nutrisaun ne'ebé ita iha, no sei fahe ba ema hotu ne'ebé hanesan tarjetu.

Tau nafatin konsiderasaun ba ita hotu nia hanoin ba intervensaun nutrisaun sira, ho apoiu ne'ebé iha hanesan temporariamente hodi responde ba nesesidade saúde Inan nian maibé importante liu ba promove nafatin no kosumu ai-han nutritivu lokál oioin ba mellora saúde,” tenik MS.