Ministériu Saúde hala’o Tomada de Posse ba Kargu Diretór Jerál, Diretór Nasionál, Diretór Unidade ba INSP-TL no Diretór foun tolu iha Servisu Sentrál Ministériu Saúde.
Ministra Saúde, dr. Odete Maria Freitas Belo hatete, Ministériu Saúde avansa tan pasu ida ba oin atu kompleta prosesu kirasaun Institutu Nasionál Saúde Públika Timor-Leste (INSPT-TL), funsionáriu hirak ne’ebé foin simu kna’ar ne’e atu haforsa kondisaun téknika no materiál laboratóriu nasionál hodi eleva kapasidade resposta no padraun kualidade servisu laboratóriu fasilidade saúde públiku no privadu iha rai laran.
Hamutuk ho parseiru dezenvolvimentu sira atu bele investe maka’as liután iha área kapasitasaun no formasaun kontinua ba profisionál saúde sira hodi hadi’a kualidade prestasaun servisu. Promove literasia saúde ka eduka populasaun kona-ba ábitu no komportamentu sira ne’ebé saudável.
Hadi’a atividade vijilánsia epidemiolójika no sanitária hodi kontribui ba prevensaun no kontrolu infesaun iha komunidade no fasilidade saúde sira. Kontribui di’ak liután ba dezenvolvimentu área peskiza no investigasaun saúde, fornese informasaun saúde ne’ebé realístiku no credível bazei aba evidénsia dadus iha rai laran.
Estrutura foun loke dalan atu hadi’a di’ak liután kna’ar Ministériu Saúde nu’udar órgaun Guvernu responsável ba ba governasaun sistema nasionál saúde
Ministériu Saúde hahú órgaun foun ida tan ho naran Unidade Jestaun Projetu, unidade ne’e atu lidera prosesu planeamentu, monitorizasaun no surpervizaun ba projetu hirak ne’ebé Guvernu aprovra ba setor saúde liuhusi fundu infra-estrutura, empréstimu ka grants husi parseiru dezenvolvimentu sira.
Halo mós alterasaun ba estrutura interna husi Diresaun Jerál Saúde hodi estabelese Diresaun Nasionál Nutrisaun atu akomoda estratégia polítika ida liga ho luta hasoru manutrisaun.
Diresaun Nasionál Apoiu Prestasaun Kuidadu Saúde Primáriu no Familiár subtitui Diresaun Nasionál Saúde na Família hodi assegura implementasaun polítika no estratéjia nasionál saúde materno-infantil, saúde joven no adolesente, saúde ema adultu no idozu liuhusi apoiu prestasaun servisu integradu saúde komunitária.
Marka mós prezensa iha serimónia ne’e mak, Prezidente INSP-TL, Dra. Merita Monteiro, Diretór Nasionál MS nomós Reprezentante sira husi Parseiru Dezenvolvimentu.
