Ministra Saude dr. Odete Maria Freitas Belo partisipa Iha Diálogu "REFORSA REZILIÉNSIA" Iha Munisipiu Ainaro

Autoridade Ainaro husu Ministériu Saúde atu reabilita fasilidade saúde nomós alojamentu ba médiku sira ne'ebé destakadu iha Munisípiu Ainaro.

Asuntu ne'e hato'o iha Diálogu Esélensia Primeiru Ministru Sr. Taur Matan Ruak ho Autoridade Lokál no Komunitária Ainaro nian "REFORSA REZILIÉNSIA NASAUN NIAN", iha salaun Parokiál Ainaro, Munisípiu Ainaro, 10 janeiru 2022.

Ministra Saúde "Médiku sira-nia alojamentu, prontu tuir informasaun ne'ebé mak iha, tuir dadus ne'ebé mak iha katak ita iha postu saúde ida ne'ebé mak presiza atu reabilita, ne'e mak postu saúde Edi nomós postu saúde Maununo ne'ebé mak ninia rezidénsia ba médiku sira laiha."

"Ami hakarak mós fahe informasaun iha katak durante ida-ne'e ita harii postu saúde ou sentru saúde, ita nunka hanoin atu prepara rezidénsia ba médiku sira."

"Rezidénsia ba médiku sira ita hahú planeia no tau iha implementasaun 2021 entaun ita espera katak tinan-tinan wainhira ita propoin atu halo postu saúde ita halo kedas ona pakote ida postu saúde hamutuk ho rezidénsia ba médiku sira."

"Iha parte seluk hakarak mós atu hato'o katak normalmente Ministériu Saúde iha politika ida wainhira atu koloka médiku ida bá iha sentru saúde ida iha lala'ok ruma."

"Primeiru médiku rasik husu atu hela iha fatin ne'ebé mak nia hakarak bá tanba wainhira nia rasik mak deside ou nia teste manan iha fatin ne'ebé mak nia bá signifika katak nia iha hela fatin iha fatin ne'ebé mak nia propoin atu serbísu bá maibé wainhira Ministériu Saúde mak husu ou halo destakamentu MS iha obrigasaun atu alojamentu ba médiku refere."

Ministra hatutan tan "Iha inisiu wainhira ita Timor-Leste ukun-an primeiru ita halo rekrutamentu ba médiku sira ne'ebé remata estudu iha Nasaun Cuba, ho kedas ona ninia kriteria no sira ne'ebé mak bá estudu medisina iha Cuba wainhira fila-fali mai, sira sei bá serbísu iha fatin ne'ebé mak sira hela bá, ne'e politika ida no médiku sira labele halai sees ou konsentra hotu iha fatin ida maibé tenki halo distribuisaun adekuadu atu nune'e bele fó asisténsia ba ita-nia komunidade."

"Maibé ho tempu ne'ebé mak la'o, ita labele husik sira hela iha ne'ebá, maibé sira mós presiza atu eskola tan, aumenta sira nia esperensia no kapasidade iha óspital no bá iha sidade atu tuir treinamentu ruma, nomós balun ne'ebé mak kaben sei tuir sira-nia família, ida-ne'e distribuisaun ne'ebé mak Ministériu Saúde halo."

#MédiaPaláciodasCinzas