MS assina ME ho Ministru Defesa

19 jullu 2022: Ministra Saúde dr Odete Maria Freitas Belo ho Ministru Defeza Brigadeiru Jenerál Filomeno da Paixão de Jesus asina Memorandum Entendimentu iha Kuartel Jerál F-FDTL, Fatu-Hada, Díli. Akordu ne'e hanesan akordu dahuluk entre Ministériu Saúde ho Ministériu Defeza nian oinsá atu halo kapasitasaun rekursu umanu iha área espeslsializasaun medisina.

Minsitra hatete tan Ministériu Saúde nafatin iha planu atu kontinua kapasita profesionais saúde sira liu-liu iha área espesiálista hodi bele hadi'ak di'ak liu prestasaun kuidadus saúde sekundária no tersiaria hodi hadi'ak saúde populasaun Timor-Leste. "Ministériu Saúde hahú estabelese kooperasaun ho Nasaun hirak mak hanesan; Kuba, Xína, Fiji, Papua New Guinea, Indonézia, no seluk tan iha área Dezenvolvementu Kapasitasaun Profesionál Saúde. Kooperasaun ho Nasaun Kuba hahú kedas depois Timor-Leste ukun rasik an iha tinan 2004 no to'o agora liuhusi akordu purvolta médiku jerál ne'ebé gradua ona hamutuk 921.

Aliende ne'e iha 74 médiku espesialista iha área oin-oin ne'ebé distribui ona iha ospitál referensia no HNGV maibé númeru hirak ne'e seidauk sufisiente atu bele hala'o prestasaun Kuidadus Saúde Sekundária ho Tersiaria iha Timor-Leste."

"Ohin Ministériu Saúde ho Ministériu Defeza estabelese kooperasaun entre parte rua iha dezenvolvementu rekursu umanu iha área saúde. Tuir planu iha tinan 2022 sei haruka uluk médiku na'in rua (internista ho kardiolójia) ba nasaun Kuba.

Tinan 2023 haruka tan na'in haat (sirurjia rua no anastezia rua) ba nasaun Fiji, iha tinan 2023 mos sei haruka tan jestaun ospitál na'in ida, psikolójia na'in ida, tékniku aliadu na'in sanulu resin rua bá Nasaun Indonézia, tanba ne'e, serimónia asina akordu entre MS ho MD akontese iha tempu ne'ebé loos no oprtunu atu bele iha tempu badak sira bele asesu ba universidade sira iha rai liur ne'ebé estabelese ona akordu ho MS."

#MédiaPaláciodasCinzas