MS-AUSTRÁLIA LANSA PROGRAMA HAFORSA SISTEMA SAÚDE IHA KUIDADU SAÚDE PRIMÁRIA

16 Maiu 2002, Ministra Saúde dr. Odete Maria Freitas Belo, Embaixadór Austrália nian mai Timor-Leste hamutuk ho Prezidente Autoridade Rejiaun Administrativa Espesiál Oe-cusse Ambeno (RAEOA) Sr. Arsenio Paixão Bano, Prezidente Autoridade Munispál Ermera hala'o lansamentu programa DFAT kona-ba "HAFORSA SISTEMA SAUDE IHA KUIDADU SAÚDE PRIMÁRIU" Eventu ida-ne'e kontinua nafatin suporta husi DFAT Governu Austrália nian ba prosesu dezenvolvimentu Sistema Nasionál Saúde iha Timor-Leste ba área tolu ne'ebé selesionadu mak hanesan Munisípiu Ermera, Dili no RAEOA. Ministra Saude iha diskursu:

"Ha'u sente komprometidu atu representa VIlI Guvernu Konstitusionál iha setor saúde hodi kontinua halo esforsu hodi assegura katak Ministériu Saúde hamutuk Ministériu no Instituisaun Guvernu nian, hamutuk ho parseirus dezenvolvimentu bele finansia no jere implementasaun prioridade polítika setor saúde nian, inklui iha kuidadu saúde primária". Ministériu apresia tebes kompromisu no kontribuisaun husi parseiru dezenvolvimentu bilateral no multilateral sira, no mos parseiru implementadór, tékniku hirak (nasionál no internasionál) ne'ebé durante ne'e kontinua hatutan Ministériu nia liman hodi bele fornese asistensia saúde ne'ebé di'ak ba povu Timor-Leste. Globalmente, deklarasaun Astana iha tinan 2018 fo indikasaun katak, 80-90% husi ema nia nesesidade ba kuidadu saúde, bele fasilita iha nível fasilidade kuidadu saúde primária, maibé dalabarak ema labele hetan asisténsia saúde ne'ebé sira presiza.

Iha mós indikasaun katak investimentu iha kuidadu saúde primária bele fasilita utilizasaun rekursu ho diak (poupa rekursu), iha parseria ho komunidade. Iha Timor-Leste, asesu ba asisténsia saúde hanesan direitu umanu ema ida-ida nian, nune'e ema hotu-hotu tenki hetan asisténsia saúde ne'ebé nia presiza. Ida ne'e ami-nia no ita hotu nia responsabilidade. Ohin loron, Ministeriu hakarak agradese ba Governu Austrália, ho prezensa Embaixadór ho ekipa iha ne'e nomós ninia implementadór sira, tan kontinua iha kompromisu no vontade atu tulun ami hadi'a liu tan prestasaun saúde iha Timor- Leste. Kompromisu no kontribuisaun husi Governu Australia la'os mak foin hahú no la'os mak ida ne'e deit. Ha'u hatene katak iha kontribuisaun oioin, inklui kontribuisaun bilateral ida ne'e.

Hahuu tinan 2019, wainhira DFAT iha Timor-Leste mai aproxima Ministériu Saúde kona-ba programa ida ne'e, ha'u ho ha'u nia ekipa tekniku sira interese tebes kona-ba programa ida ne'e, ha'u ho ha'u nia ekipa tekniku sira interese tebes ba tamba, DFAT iha hanoin atu serbisu hamutuk hodi hadi'a sistema saúde prestasaun asistensia saúde iha nível kuidadu saúde primária. Vontade di'ak ida-ne'e hanesan evidénsia ida katak, DFAT rekuñese instituisaun governu ida-ne'e ninia lideransa no esforsu, rekuñese katak prosesu desentralizasaun mós la'o dadauk ona, rekuñese katak iha progresu di'ak iha setor ne'e maibe sei iha mos parte barak atu kontinua hadi'a.

DFAT hatudu vontade atu mai tulun no fasilita Ministeriu Saúde nia esforsu tomak atu melloria dezempenu prestasaun kuidadu saúde primaria. Hanoin ida ne'e mai wainhira Ministériu mos hahú hanoin atu revee ninia planu estratéjiku nasionál ba setor saúde, no politika ba prestasaun asistensia saúde iha nível kuidadu saúde primária nian (pakote servisu esensiál ba kuidadu saúde primária). Ami hakarak tebes atu aproxima no organiza prestasaun kuidadu saude primaria ne'ebé integradu, nune'e bele jere no utiliza didiak rekursu aloka ona ho efisienti hodi bele to'o ba rezultadu mudansa-ba ema nia saúde ne'ebédiak liu tan Ita hotu nia espetativa. Ha'u akompaña katak prosesu ba inisiativa ne'e involve kedas ekipa tekniku Ministériu Saúde nian husi inisiu, hahú husi wainhira trasa diresaun estratejiku, to'o ba dezeñu detallu, liu husi dialogu regular ho ekipa Ministeriu Saúde nian, iha nível tekniku no nível lideransa. Ha'u mós sempre hetan informasaun regular kona-ba prosesu tomak. Agora dezeñu hotu ona, DFAT ho Ministériu Saúde mos aprova ona investimentu ida ne'e.

Ita tama ona ba parte importante ida iha ita nia serbisu hamutuk, hahú hadi'a serbisu, ita ida-ida nia knar atu iere, finansia no benefisia povu Timor-Leste nia nesesidade ba kuidadu saúde primária. Oras nee ita tama ona ba faze hahú implementasaun, ita precisa haree namutuk problenma sistemátiku saida mak ita presiza hadi'a hamutuk, ho hanoin naftatin katak, se ita hadia problema ne'e karik, sei kontribui ba melloria komunidade ida ninia saude iha Ermera, Dili ka iha RAEOA. Fasilitasaun ida ne'ebé bele tulun ita atu fornese duni asistensia saude ba inan isin- rua ho sira nia kosok-oan, labarik malnutritivu, maluk ne'ebé sofre TBC, ferik ka katuas ne'ebé presiza asisténsia saúde, maluk ne'ebé presiza asistensia planeamentu família, no tulun mós ita atu hasoru pandemia saúde publika ruma.

Ha'u hein katak ita hamutuk ho parseiru DFAT no implementador sira (PHD, MSTL, no seluk tan), bele serbisu hamutuk ho kompromisu no responsabilidade hodi fasilita duni prestasaun saude iha CHC no Postu Saúde iha munisipiu Dili no Ermera, no iha rejiaun RAEOA. Obrigada ba DFAT tamba hakarak mai hamutuk ho ita atu dudu serbisu importante ida ne'e.

MS-Palácio-Das-Cinzas-Caicoli