MS Hala'o Vizita Ba Suku Kairui, Postu Administrativu Laleia, Munisipiu Manatuto

12 maiu 2022: Ministra Saúde (MS) dr. Odete Maria Freitas Belo hamutuk ho Embaixadór Uniaun Europeia (EUA) iha Timor-Leste Sr. Andrew Jacobs no Reprezentante UNICEF iha Timor-Leste Sr. Bilal Aureng Zen Durrani hala'o vizita bá Suku Cairui hodi partisípa iha Grupu Suporta Inan halo demostra ai-han ba labarik tinan 5 mai kraik, iha Postu Administrativu Laleia, Munisípiu Manatutu.

Futuru jerasaun labarik atu sai matenek no ho nutrisaun ne'ebé di'ak, presiza prepara ai-han ne'ebé di'ak ba oan liuhusi serbísu hamutuk entre feen ho laen hodi tau matan ba oan sira. Fó atensaun ba oan ne'ebé iha inan-nia knotak atu inan bele deskansa, han hahán ne'ebé di'ak nune'e mós oan sira-ne'ebé tinan 5 mai kraik. "Itrua ba buka hamutuk osan, ha'u mai tein fase roupa, fase bikan, aman tuur de'it ne'e jender ne'e lala'o.

Maibé ha'u hanoin sekarik ita iha uma laran ne'e hamutuk, ha'u fase roupa, ó fase bikan, tanba dalaruma ami feto ne'e tempu atu halo hahán hanesan ohin, tanba saidá, tanba ami haree buat barak, ami tenki haree imi-nia roupa, imi-nia matabisu hotu, depois ami haree fali ami-nia oan sira, entaun to'o ona atu haree ami-nia oan sira-ne'e tempu laiha ona.

Ami kolen ona, entaun naran foos mutin ruma iha ne'e ami te'in dodok ga la dodok mós importante nia been iha, kental oituan ami fó ona ba ami-nia oan sira, maibé parte rua feen ho laen ajuda malu, komesa husi dadeer hadeer mai entaun tempu ba ami ne'e barak para bele tau matan mós ba ami-nia oan sira."

Tinan ida-ne'e Governu liuhusi Eselénsia Primeiru-Ministru Sr. Taur Matan Ruak fó atensaun liu ba iha setór edukasaun no saúde katak Governu hakarak atu haree ema, tamba ema mak sai sentru ba iha dezenvolvimentu.

"Entaun ita hakarak atu haree ba ema, dala ruma ita sira-ne'ebé mak ho idade hanesan ita nian dalaruma ita atraza ona, maibé sekarik ita haree kona-ba ita-nia alin sira-ne'e, ki’ikoan sira-ne'ebé mak ohin iha ita-nia oin, hein loron tomak prontu atu bele haree prepara hahán oan ruma.

Hahán ne'ebé nakonu ho nutrisaun ba sira, ida-ne'e mak importante ba sira, tanba sira sei sai hanesan jerasaun ba ita iha futuru.”

Ministériu Saúde (MS) agradese ba iha Uniaun Europeia ho ninian apoiu tomak nomós liuhusi Unicef ne'ebé mak serbísu hamutuk ho MS espesiálmente serbísu ho Diretór sira iha Munisípiu Manatuto nian, nomós ho ita-nia grupu Suporta Inan, NGO-HIM, Ajénsia Nasionál, Internasionál nomós Autoridade Lokál, Lider komunitária ba serbísu hamutuk ida-ne'e.

MS-MS-2022