MS Ho Prezidente Komisaun Funsaun Publika Selebra Asinatura Diplomata Konjunta

16 fevereiru 2022: Ministra Saúde dr.Odete Maria Freitas Belo ho Prezidente Komisaun Funsaun Públika Se. Faustino Cardoso Gomes selebra asinatuta Diploma Konjunta Ministeriál entre Ministériu Saúde ho Komisaun Funsaun Públika, iha Salaun Palácio das Cinzas, Kaikoli, Dili.

Ministra Saúde "Ha'u konsidera katak serimónia asinatura Diploma Ministeriál Konjunta ohin ne'e, sai hanesan últimu degrau ka rekezitu ida ne'ebé ita presiza duni hodi finaliza lista funsionárius sira ne'ebé benefisia ba progresaun iha karreira profisionál".

"Dadus inisiu verifikadu husi tinan 2013-2018, maibé depois iha tinan klaran 2021 ministériu saúde konsidera katak di'ak liu atu bele inklui mós rezultadu avaliasaun desempeñu husi tinan 2019".

"Infelizmente prosesu ida-ne'e demora tempu naruk maibé finalmente ita hotu bele optimista tanba tinan ida-ne'e ita bele publika rezultadu konaba staff sira ne'ebé halo progresaun iha karreira. Tuir informasaun ne'ebé Rekursus Humanus iha, dadus verifikasaun finál rekolla hotu ona husi tinan 2013-2019 ho totál ema hamutuk: 4,127 no ho bazeia ba Dekretu-Lei no. 13/2012, 7 Marsu katak iha progresaun eskalaun profissionál saúde kada um tersu (1/3) maka husi 4,127 iha ema 1,376 mak sei hetan progresaun no iha diretu ba pagamentu ho totál orsamentu hamutuk: US$ 916,841.64".

"Ha'u espera katak rezultadu análise no relatóriu kompletu sei aprezenta brevemente ba ha'u no ba Sr. Presidente KFP depois de asina diploma konjunta".

Ha'u nota katak Publikasaun rezultadu rekapitulasaun finál dadus Avaliasaun Desempeñu periódu tinan 2013-2019 ba funsionário rejime espesial komesa husi loron 1-30 marsu 2022, hodi fó biban atu bele halo reklamasaun ba rezultadu ne'ebé rekorda ona iha sistema SIGAP.

Tempu ba rekonsilia no konsolida dadus reklamasaun husi loron 31 marsu -10 abril 2022. Despaixu Prezidente Komisaun Funsaun Públika kona-ba diretu ba progresaun no publika iha Jornál da Repúblika entre data 11-20 abril 2021.

Pagamentu ba diretu progresaun skalaun ba profisionál saúde komesa iha pagamentu salariu fulan maiu 2022. Ministériu daúde kontinua hala'o esforsu boot hodi kontinua prosesu ida ne'e ba oin tanba difísil maka atu arranka, maibé prosesu hahú ona, entaun ba hin fásil liutan.

Nu'udar Ministra da Saúde ha'u iha esperansa katak maluk sira ne'ebé latama iha lista nomós ba sira ne'ebé lahalo progresaun iha karreira durante tinan ida-ne'e sei kontinua kuda no haburas espíritu profisionalismu no dedikasaun umana i kaer metin prinsipiu Ethos, Pathos e Logos iha ita-boot sira servisu loron-loron.

Ha'u mós iha esperansa katak durante hala'o imi nia knaar loron-loron sei servisu hamutuk no hakoak ema ou parte hotu atu dezenvolvimentu sistema saúde nasionál Timor-Leste, tuir prinsipio: "Visaun Ida-Liman Barak-Serbisu Hamutuk atu halo Diferensa ba prosesu Dezenvolvimentu Saúde ne'ebé Sustentável".

#MédiaPaláciodasCinzas