Profesionais Saude Partisipa Iha Treinamentu Anti-Mikrobiu

Iha loron 19 to’o loron 22 fulan setembru 2022, pesoál saúde Timor-Leste, Suzana Henrique ho Doutora Maria Francisca Soares partisípa treinamentu kona-ba Konsumu Antimikrobiu iha New Delhi, Índia.

Partisípa iha treinamentu ne’e kompostu hosi Médiku no Farmaseutiku inklui mós tékniku profisionál sira seluk ho objetivu atu kapasita pontu fokál husi nasaun-11 Sudeste Aziátiku nian kona-ba konsumu antimikrobiu no prepara pontu fokál sira inklui Timor-Leste atu oinsá kolekta, analiza no relata dadus konsumu antimikrobiu ne’ebé loos hosi kada fasilidade saúde públiku. Fasilitadór espesialidade ba konsumu antimikrobiu nian hosi Kuartel Jerál Organizasaun Mundiál Saúde iha Jenebra, Suisa.

Timor-Leste iha ona Planu Asaun Nasionál Rezisténsia Antimikrobiu versaun segundu tinan 2022 - 2026. Iha planu asaun refere iha prioridade objetivu lima, prioridade objetivu segundu koalia kona-ba vijilánsia rezisténsia antimikrobiu inklui kontrolu konsumu antimikrobiu ho ninia atividade ne'ebé espesifiku. Kontrolu Importasaun ai-moruk inklui mós setór privadu hanesan importadór, farmásia retallu no klínika iha teritoriu laran tomak.

Timor-Leste rejistu ona iha “Global Antimicrobial Resistance and Use Surveillance System (GLASS) iha tinan 2019, kada tinan nasaun sira ne’ebé mak registu ona tenki submete relatoriu konsumu antimikrobiu annual ba OMS Jenebra.

Agora dadaun pontu vogal GLASS AMC hosi Timor-Leste nian prepara ona dadus konsumu antimikrobiu hosi fasilidades saúde primária hosi tinan 2016 to’o 2019 sei relata ba OMS Jenebra iha fulan outubru nia laran.