Vise-Ministru Saúde, Sr. Bonifácio Mau Coli dos Reis Hala'o Abertura Workshop Mikroplanu

20 janeiru 2022: iha Salaun Novu Turizmu, Dili, Vise-Ministru Saúde, Sr. Bonifácio Mau Coli dos Reis hala'o abertura workshop mikroplanu hodi identifika prioridade, roteiru, no orsamentu ba kampaña no implementasaun vasinasaun kontra Covid-19 iha Timor-Leste.

Mikroplanu nu’udar baze ba desizaun polítika, desizaun ba akizisaun no finansiamentu kontínua husi doador sira ho nune’e vasina disponivel ba sidadaun elijivel iha Timor-Leste. Workshop Mikroplanu vasinasaun kontra Covid-19 nu’udar oportunidade di’ak hodi deskuti no dezenvolve planu detalhadu no kompreensivu ba implementasaun vasina kontra Covid-19 ba primeira no segunda doze no doze reforsu ka booster ba grupu alvu sira.

VMS hateten, “Imi nia esforsu tomak no kontribuisaun husi parte relevante sira hotu liuhusi apoiu rekursus umanus, finanseira, lojisítika, kolaborasaun, koordenasaun, komunikasaun bele hala’o implementasaun ba vasinasaun iha Timor-Leste laran tomak”.

“Realidade dezafiu barak liu durante implementasaun vasina covid-19, desafiu hasoru komunidade, dezafiu iha terrenu, dezafiu ba kestaun lojístika, dezafiu hasoru mídia sosial no elektronika ne’ebé hala’o kampaña “Hoaks” hodi hata’uk komunidade ba simu vasina kontra COVID-19. Maibe, ita bele ultrapassa situasaun sira-ne’e hotu hodi hasa’e kobertura ba primeira doze, segunda doze no doze boosters".

Covid-19 sei sai nafatin ameasa ba saúde públika iha mundu tomak ho total kazu to’o janeiru 2022, hamutuk 295. 244. 646 kazu, ne’ebé globalmente hamate ona ema 5.457.604 iha mundu, Partikularmente ba kazu Covid-19 iha Timor Leste, husi total kazu 19.866, ema ne’ebé mate tanba Covid-19 to’o janeiru 2022, hamutuk 122. To’o 19 janeiru kazu ativu hamutuk 15.

Vise-Ministru dehan esforsu oioin iha área saúde kontinua realiza ho forma promosaun, edukasaun, prevensaun, detesaun no tratamentu hodi diminui kazu foun, aumenta rekuperasaun ba kazu sira hodi evita ema mate tan Covid-19. Partisipasaun ho espíritu no optimismu husi komunidade hodi hola parte ativu iha esforsu preventivu sira inklui partisipasaun ativu iha vasinasaun kontra Covid-19 ne’ebe lori Timor-Leste nu’udar nasaun dalima husi nasaun sira iha Sudeste Aziátiku ne’ebé konsege proteje populasaun ho kobertura 40% husi total populasaun ba doze rua vasina kontra Covid-19.

"Haree ba progresu vasina kontra Covid-19 iha Timor-Leste populasaun ho idade tinan 18 ne’ebé hetan ona vasinasaun kontra Covid-19 ba dala rua ho total 528.680 ka ekivalensia ho 70%. Programa vasina kontra Covid-19 espande mós ba labarik ho idade tinan 12 -18 ho vasina Pfizer iha eskola no labarik sira iha komunidade iha Munisipiu Dili, labarik sira-ne’ebé simu ona vasina Pfizer hamutuk 36.054 ka 70.8% husi labarik sira ho idade tinan 12-18 iha munisipiu Dili. Vasina ba doze booster ka reforsu mós hala’o ona ba grupu perioritárius sira ho kobertura 5.030/ ka 7% iha Munisipiu Dili".

"Ho konsiderasaun ba variante foun SARS-COV-2, Omicron ne’ebé ho tranzmisaun la’o lais tebes iha nasaun barak iha mundu tomak, implementasaun planu vasinasaun kontra Covid-19 nu’udar estratejia sentral hodi prezerva vida umana iha kontestu pandemia Covid-19.

Ho nune’e Ministériu Saúde kontinua hala’o estratejia vasinasaun kontra Covid-19.

Ministériu Saúde rekoñese importansia husi planeamentu ba implementasaun vasina kontra Covid-19 konsentradu iha politika ne’ebé bele asegura sistema sosa vasina no alokasaun rekursus. Atu implementa ho susesu, esensiál tebes esforsu kolaborativu entre governu, parseiru dezenvolvimentu, ajénsia, organizasaun, akademia, sosiedade sivil, krensa relojioza no komunidade. Iha servisu saúde munisipál no fasilidade saúde sira, aseitasaun no distribuisaun ekuitativa husi vasina Covid-19 depende husi mikroplanu ne’ebé diak no kontinuamente finansiadu.

Vise mós ho esperansa “Lori Ministériu Saúde nia naran hakarak hato’o rekoñesimentu ba Komisaun no Sub-komisaun ba vasina kontra COVID-19 no parte interesadu ka entidade sira hotu WHO, UNICEF, Doadores, USAID, DFAT, no sira seluk tan ne’ebé ha’u la temi hau-nia agradesimentu boot ba diskusaun ba mikroplanu ida-ne’e, hein katak depoisde workshop ida-ne’e sei hamosu planu detalladu ba implementasaun vasina kontra COVID-19.

#MédiaPaláciodasCinzas