17 Marsu 2023: Ministériu Saúde (MdS) liuhosi Vise-Ministru Saúde (VMS) Bonifácio Mau Coli dos Reis simu medikamentus doasaun hosi Kompañia Zamancartel Berhad Group Malaysia hodi fó asisténsia ba populasaun Timor. Iha Salaun Ekontru, Palácio das Cinzas, Caicoli, Dili.
VMS iha biban ne’e hatete “Hodi MdS nia naran ba dalauluk agradese no hato’o obrigadu barak ba Sua Excelência Senhor Primeiru-Ministru no Prezidente Compania Zamancartel, ne’ebé konvida ona ami atu prezente iha ne’e.
Hodi partisipa iha serimonia entrega Medikamentus husi Compania ba Governu Timor-Leste, partikularmente ba MdS ne’ebé nu’udar instituisaun Governu nian ba implementasaun no asegura polítika saúde tomak iha Timor-Leste.
Dala ida tan hakarak atu espresa ami-nia sentidu no profundu gratidaun ba apoiu ba Medikamentus no insumu médikus ne’ebé fornese husi Kompania Zamancartel Berhad Group.
Imi-nia apoiu nu’udar sentidu solidariedade atu haforsa, hametin no mellora ami-nia Sistema Nasional Saúde (SN) ho objetivu atu hadi’ak komunidade Timor-Leste nia saúde no moris di’ak iha nível Nasional, Munisipál, Postu Adminstrativu, Suku no Aldeia ikusliu maka Komunidade no família ida-idak.”
“MdS tau iha konsiderasaun no rekoñeze katak kolaborasaun no kooperasaun mútua ho parseiru dezenvolvimentu, parte interesadu/stakeholders, Ajénsia Nasoens Unidas, Ajénsia doadores maka pertinente tebes atu alkansa vizaun, misaun no meta ne’ebé define tiha ona iha Planu Estratéjiku Dezenvolvimentu Nasional Setór Saúde tinan 2011 – 2030.
Tanba nune’e ho prezensa husi Compania Zamancartel nu’udar Kompañia ida-ne’ebé aleinde halo doasaun voluntária ba medikamentus, hanesan mós doasaun ba Foos ba Eskritoriu Sua Excelencia Presidente Republika nian ba nesesidade nutrisaun labarik sira no doasaun ba Solar Street Light.
Ami mós haree katak Kompañia iha ona inisiativa atu investe iha Planu ba fabrikasaun makaraun Instanteneu. Signifika katak iha futuru sei iha kolaborasaun besik ho MdS ligadu ba aspetu ijienasaun no pasteurizasaun.”
VMS hatutan “Hakarak atu partilla katak MdS mós simu ofisiu husi Excelénsia Ministra Negócios Estrangeiro e Cooperação (MNEC). Kona-ba doasaun Medikamentus ne’ebé maka sei fornese husi Kompania Zamancartel Berhad Group.
Tanba nune’e MdS diplomatikamente prepara ona karta no aneksu ho lista Medikamentus no Insumu Médikus no envia ba MNEC hodi hatutan ba referida Kompañia. Maibé tanba Medikamentus no Insumu médikus sira-ne’e iha ona, MdS agradese tebes ba Kompania. Medikamentus no Insumu Médikus sira-ne’e sei entrega no armazena diretamente iha Servisu Autonomu ba Médikamentus no Ekipamentus Saúde (SAMES) hodi distribui tuir nesesidades no pedidu husi estabelesimentu prestasaun kuidadus saúde sira iha Timor-Leste laran tomak.
Atu konklui, lori MdS nian naran hakarak agradese ba Kompania Zamancartel Berhad Group ba imi–nia apoiu no doasaun, hein katak iha futuru ita bele iha kooperasaun no kolabarasaun di’ak liután nune’e bele hadi’ak povu nia moris no saúde."
Partisipa iha serimónia refere mak; Reprejentante hosi Embaixada Malaysia iha Timor-Leste, Prezidente EDTL.IP, Diretor Nasional Farmasia no Medikamentus, Kuadrus Ezekutivus ho MdS nian, funsionáriu no seluk-seluk tan.
